LAOAG CITY – Balligi ti naiyuswat ti drug buy bust operation nga indauloan ti Provincial Drug Enfrocement Unit-INPPO iti Brgy. 17 iti ili ti San Nicolas.
Binigbig ni PLt. Jackson Sugayen, ti action officer ti Police Drug Enforcement Office (PDEO) ti subject ti operasyon a ni a ni Mr. Jerry Valdez, dati a balod iti Ilocos Norte Provincial Jail (INPJ).
Segun ken ni Sugayen, naannayas ti nagbalin a transaksyon nu sadino a tallo a sachet ti maatap a shabu nga agdagsen ti maysa a gramo ti inlako ti suspek iti maysa a pulis a nagpammarang a poseur buyer ken maysa a sibilyan.
Inbatad na a malaksid iti maatap a shabu nga addaan ti street value a 10,000 ket adda pay ti 2,000 a pisos a nausar kas buy bust money.
Mainaig iti daytoy, inpakaammo ni Sugayen a ti suspek ket miembro ti maysa a drug group ken datin a natiliw idi 2015 gapu met laeng iti iligal a droga ngem nawaya-wayaan.
Kabayatanna, naiget a naglikudan ti suspek ti alegasyon kenkuana.
Kuna na nga agpakpakan kadagiti taraken na a baboy idi napan dagiti nagpammarang a gumatang ti maatap a shabu.
Inpetteng na nga awan ti ikot na nga iligal a droga ken saan a naglako nu di ket aramid laeng dagiti otoridad ti pannakatiliw na.
