LAOAG CITY – Inlawlawag ti dati a bank manager a ni Mr. Estelito Baltazar Pablo a ti manager’s checks ket mismo a ti bangko ti mangisyu a manggarantiya ti bayad, saan a kas ti personal checks ti maysa a depositor.
Ti palawag ni Pablo ket adda ti pakainaigan inbutaktak ti maysa a witness iti impeachment trial ni Vice President Sara Duterte nga adda ti maipagarop a nasurok a P96 milyon manipod iti joint account da dati a Presidente Rodrigo Duterte ken ti bise presidente ti paulit-ulit nga inaramid a manager’s checks.
Inbatad na a ti proseso ket agturong iti bangko tapno gumatang ti manager’s checks sadinno a ti kantidad ket ikkaten ti bangko manipod iti deposit account ti maseknan.
Segun kenkuana, ti mapasamak ket ikkaten ti kantidad iti personal account ken ikabil iti manager’s check, kayatna sawen ket liability ti bangko.
Inpakammo ni Pablo a masansan a pakaus-usaran ti manager’s check ket ti dadakkel a transaksyon kas ti paggatang ti balay, lugan, pagbayad iti dakkel a supplier wenno pang-settle iti obligasyon.
Kuna na pay a no minilyon ti gatangen a manager’s check ket maikkat a dagus iti account ti depositor iti dayta metlaeng a gundaway.
Nupay kasta, inrakurak na a no saan pay a na-encash ti kwarta ket agtalinaed daytoy iti bangko ngem addan iti sabali nga account ken saanen nga iti nagan ti depositor.
