LAOAG CITY – Natiliw ti dati a barangay kagawad iti Brgy. Aruaay iti ili ti Piddig babaen ti drug buy bust operation dagiti kameng ti nailian a pulisya.
Nabigbig ti high value individual iti provincial level a ni Remigio Ventura, agtawen ti 44, awanan asawa, ken residente iti nasao a barangay.
Iti naiyuswat nga operasyon, nagpammarang a gumatang ti iligal a druga ti maysa a pulis idi ta iyawat ti suspek ti maysa a sachet a naglaon ti maipagarup a shabu ket dita a ginammatan dagiti otoridad.
Iti pannakakapkap ti suspek, narekobre pay dagiti otoridad ti dua a sachet a naglaon ti maipagarup a shabu, 1,000 peso buybust money, ken 25 a pisos a personal a kuarta na.
Maibilang ti dati a barangay kagawad iti listaan ti Inter-Agency Drug Information Database wenno dati a PRRD list.
Naamuan a natiliw ti dati a kagawad idi tawen 2016, temporaryo a nawaya-wayaan idi tawen 2019 ken daytoy ti maikadua a daras a pannakatiliw na iti isu met laeng nga operasyon.
