LAOAG CITY – Natiliw iti drug buy-bust operation ti dati a barangay kagawad iti Barangay 24 iti ili ti San Nicolas.
Nabigbig daytoy a ni Cesar Turwel, agtawen ti 43, tricycle driver, drug surrenderer idi 2016 ken residente met laeng iti nadakamat a barangay.
Ti naisayangkat nga operasyon ket nagbinnuligan ti PNP-San Nicolas, Regional Drug Enforcement Unit ken PDEU.
Segun ken ni Police Major Joseph Baltazar, ti chief of police iti ili ti San Nicolas, natiliw ni Turwel kalpasan a naglako ti maysa a plastic sachet a maipagarop a naglaon ti shabu iti nagpammarang a pulis poseur-buyer nga agbalor ti sangaribo a pisos.
Iti pannakakapkap ni Turwel ket nakaala pay dagiti otoridad ti maysa a sachet a nabungon ti papel a naglaon met laeng ti maipagarop a shabu ken ti sangaribo a pisos a nausar iti operasyon.
Kabayatanna, inistorya ni Turwel nga adda iti lugar tapno mapan koma agsingir iti pautang na, ngem maipagarop nga adda ti nagdamag kenkuana no paggatangan ti piyesa gapu ta naperdian ti lugan da.
Inbaga na nga adda ti inbaga na a mabalin a paggatangan dagiti maseknan iti kasapulan da ngem maipagarop a ditoy metten a kinapkap da daytoy.
Inadmitir ni Turwel a nagus-usar idi iti illegal a droga ngem nagsurrender idi Hulyo 25, 2016 ken sipud idi ket naminpinsanen a naglikudan na ti illegal nga aramid na.
Mainaig iti daytoy, inbaga ni Baltazar a naipagagangayen a no adda ti matiliw da iti drug buy-bust operation ket kanayun nga ibaga dagiti subject a naimula laeng ti naala kadakuada.
Inpetteng ni Baltazar a nabayagen a mamonmonitor ni Turwel gapu iti illegal nga aktibidad na.
