LAOAG CITY – Saan a makaatendar iti maikatlo nga State of the Nation Address (SONA) ni Presidente Ferdinand Marcos Jr. da dati a Vice President Leni Robredo ken Jejomar Binay.
Segun ken ni House Secretary General Reginald Velasco, nagkedked dagiti dua a dati nga opisial ti imbitasion.
Saanda metten sinaludsod kadakuada ti maikagapu ti saan a panagatendar dagitoy.
Awan pay ti sungbat iti imbitasion da Vice President Sara Duterte ken ama daytoy a ni dati a Presidente Rodrigo Duterte.
Dumanon iti 2 a ribu dagiti bisita ti nangkumpirmar a makaatendarda iti State of the Nation Address pakairamanan dagiti representatives manipud kadagiti 47 a foreign embassies iti pagilian.
Kabayatanna, naammoan a dagiti aggandat a mangiwayat ti tignay-protesta a sumrek iti plenario ket naiget a saan a mapalubusan.
