LAOAG CITY – Inbatad ni Jayson Baay a taga Vintar, Ilocos Norte, maysa nga OFW manipod idiay Jeddah, Saudi Arabia a saanna a ninamnama a makasubli pay ditoy pagilyan a sibibiag.
Daytoy ket kalpasan ti nagpasaran na idiay Saudi Arabia kalpasan a naduktalan nga agsagsagaba daytoy ti sakit a renal kidney failure.
Segun kenkuana, dimmalan idi ti dialysis gapu ta isu ti inbalakad kenkuana dagiti doctor, ken no saanna nga aramiden daytoy ket mabalin a maperdi ti unegna ken possible pay nga ipatay na.
Inadmitir na nga adda pay idi dagiti gundaway a kellaat lattan nga agcolaps, agkapsut ken saan a makapagna.
Inpakaammo na a naterminate gapu ti estado ti salun-at na ken naikkan ti kompensasyon a nasurok nga 6 a ribo a Saudi Arabia Rial manipod ti nagtrabahoan na a bangko idiay Jeddah.
Innayon na nga iti kaadda nan ditoy pagilyan ket napan ti ina ken kabsat na iti OWWA ken Philhealth para ti claims na ngem nadeny.
Ni Jayson Baay ket nagbalin pay a volunteer reporter iti Bombo Radyo idi 2013 elections.
Kabayatanna, ipasingked ni Miss Geraldine Salazar, ti Communication Officer iti Regional Office iti Overseas Workers Welfare Administration (OWWA) a tulungan da ni Mr. Jayson Baay iti ili ti Vintar.
Inbatad na nga aktibo ti Philhealth ken OWWA ni Baay isut gapuna a mabalin na a gundawayan ti programa da para kadagiti OFW.
Inlawlawag na nga addan ti nakasarita ni Baay iti opisina da ken naiteden dagiti kasapulan a requirements.
Innayon na a ti umuna a pagturungan n Baay ket iti Philhealth sakbay iti OWWA.
Kuna pay ni Salazar a ti maximum nga ipapaay ti OWWA ket 50 ribo a pisos.
Kabayatanna, inbatad iti Bombo Radyo Laoag ni General Manager Orlando Pangilinan iti Philhealth nga adalen da a naimbag ti sitwasyon ni Baay.
