LAOAG CITY – Inpannakkel ni Sangguniang Panlalawigan Member Hanson Chua a manipud iti dati a bumagbagsak iti klase ken naluko nga ubing ket addaanen ita ti bukud a car dealership.
Segun kenkuana, ubing pay laeng daytoy ket naluko gapu ta no dadduma ket saan daytoy a sumsumrek iti pagadalan gapu ta kasapulanna ti agbiruk ti nayon iti balonna babaen ti panaglakona kadagiti cellphone.
Inbatadna nga idi nakatapog iti kolehio ket kinasapulanna ti agbalin a working student tapno adda ti pangsupusop iti inaldaw-aldaw a paggastosanna iti panagadal.
Inlawlawagna a nag-shift daytoy ti kurso manipud iti Engineering ket nagbalin a Business Administration nga isu ti maiyap-aplikarna iti agdama a trabahona kas maysa a negosiante.
Inpalgakna a saan a nagbalin a nalaka ti taray ti biag iti pamiliana gapu ta namin-adu a daras a na-bankrupt ti negosioda kas ti nail spa, home service massage, gym, panganan ken dadduma pay.
Nupay kasta, inpettengna a saan a ti pannakapaay ti manglapped kenkuana iti pananggun-od iti panagballigi iti panagbiag.
Mainaig iti daytoy, kuna ni Chua nga amin a pannubok a simmangbay iti biagna ket inaramidna nga instrumento tapno agbaliw ken agnakem para iti napinpintas a masakbayan.
Innayonna kas maysa a public servant iti agdama ket masapul nga ad-adda nga agbalin a seryoso iti panagtulong kadagiti umili ken komunidad.
