LAOAG CITY – Indasar ti dati a Chief Justice ti Korte Suprema a ni Antonio Carpio dagiti sumaruno nga addang a mabalin nga aramiden ti Pilipinas kalpasan nga in-hijack dagiti puersa ti China dagiti bangka ti Pilipinas iti Ayungin shoal iti West Philippine Sea idi Hunio 17.
Inrekomendar ni Carpio a baliwan ti presensia dagiti tropa ti pagilian manipud iti Ayungin shoal, ti military agingga iti civilian ken mangipqsdek iti lighthouse nga io-operar ti Philippine Coast Guard (PCG) ken mabalin da pay ti mangipasdek kadagiti substation ken research center.
Inlawlawag ni Carpio nga awan ti hurisdiksion ti international tribunal kadagiti aktibidad ti militar, isu a rumbeng a marisut ti parikut sakbay a mangipila ti pagilian iti baro a kaso kontra iti China iti Permanent Court of Arbitration idiay The Hague, Netherlands.
Innayon na a mabalin pay nga agkiddaw ti tulong ti Pilipinas iti Estados Unidos tapno agpa-eskort kadagiti resupply mission dagiti Pilipino a naka-istasyon iti Ayungin shoal, ngem inpetteng ti opisyal nga itultuloy nga iparit ti oanagusar ti paltog ken aniaman nga armas tapno maliklikan ti tensyon.
Insingasing pay ni Carpio a rumbeng nga agsapul ti Pilipinas iti diplomatic support manipud kadagiti kaalyadona tapno mangipaulog kadagiti statement kontra iti aramid ti China.
Kabayatanna, inpaganetget ni Carpio a maikontra iti international law ti inaramid ti puersa ti China iti Ayungin gapu ta napasamak daytoy iti exclusive economic zone ti pagilian ken adda met sovereign immunity ti pagilian isu a saan a mabalin a maala, matiliw wenno maagaw ti barko a pakigubat agraman dagiti auxiliary vessels.
