LAOAG CITY – Pinatawan ti maysa nga appellate court idiay South Korea ti dati a Chief Justice ti Korte Suprema a ni Yang Sung-tae ti innem a bulan a pannakaibalud ken maysa a tawen a pannakasuspenso mainaig iti maipagarup a panangabuso daytoy iti bileg ken iligal a pannakibiang kadagiti panangtingiting.
Inpataw ti Seoul High Court ti desision no sadinno nga immuna a binaliktad ti immunan a desision iti nababa a pagpandayan linteg a nangabsuelto ken ni Yang kadagiti amin a 47 a kaso a naipila kontra kenkuana.
Segun iti prosekusion, maipagarup nga inusar ni Yang, nagserbi a Prime Minister manipud idi 2011 agingga iti 2017, dagiti sumagmamano a kaso iti korte kas pananglapped wenno kasukat iti pannakikoordinar iti administrasion idi ni dati a Presidente Park Geun-hye.
Gagem daytoy a maala ti suporta para iti pannakaestablisar ti maysa a nagsina a Court of Appeals.
Nagkiddaw ti prosekusion ti pito a tawen a pannakaibalud kontra ken ni Yang ngem nalaglag-an ti desision nga inpataw ti appellate court.
Iti kapada a kaso, pinatawan met ti dati a Supreme Court Justice a ni Park Byong-dae ti innem a bulan a pannakaibalud ken maysa a tawen a pannakasuspenso idinto a pinatibker ti korte ti pannakawaswas ken ni dati a Justice Ko Young-han.
