LAOAG CITY – Inlawlawag ti Department of Justice a naminsan manen nga inarestar dagiti kapulisan idiay Timor Leste ti napadisi a ni Congresman Arnolfo Teves Jr.
Kagiddan daytoy iti sumagmamano nga oras a nawayawayaan kalpasan a maipagarup a maisupadi iti international law ti extradition request ti pagilian.
Basar iti Department of Justice nga adda iti Becora Prison iti Dili ni Teves para iti panagdengngeg ti extradition-da.
Agatendar ni Teves iti panagdengngeg kaduana ti dati nga Human Rights Commissioner Wilhelm Soriano kas representative iti human rights.
Tumakder ni Soriano tapno agbalin a testigo iti human rights violations ti pagilian.
Inbatad met ni Department of Justice spokesman Mico Clavano, no agballigi ti panagdengngeg iti extradition case ni Teves ket mabalin daytoyen a ma-deport depende iti koordinasion ti gobierno ti Timor Leste iti gobierno ti Pilipinas.
Binabalaw ni Clavano ti nagbalin nga iresponsable a rakurak ti abugado ni Teves a ni Atty. Ferdinand Topacio maipapan iti pannakawayawaya iti dati a kongresista.
Inawaganna ti rakurak ni Topacio ket maysa nga insulto kadagiti dua a pagilian.
Inpetteng ni Clavano a nakaisubmitir iti umiso nga oras ti Department of Justice dagiti dokumento a kasapulan.
Maipalagip a ni Teves ti maitudtudo a mastermind iti panangpapatay ken ni dati a Negros Oriental Governor Roel Degamo idi Marso 2023.
Sipod idin ket naglemmengen ni Teves idiay Timor Leste gapu ta maipagarup nga awan ti maaw-awatna nga hustisia iti gobierno.
