LAOAG CITY – Dakkel ti pammati ni dati congressman Rudy Fariñas ken agpaidasig a gobernador ditoy probinsya a paset iti pannaka-harass ti team da ita nga eleksyon dagiti search warrant operations a naisayangkat.
Kuna ni Fariñas nga arig na malukluko ti team na nangruna dagiti supporters na a nagbalin a biktima dagiti naiyuswat a search warrant operations.
Immuna iti daytoy, inpakaammo ni Atty. Jason Perera, ti legal counsel ti team Fariñas a nawaya-wayaan dagiti nagbalin a subject ti search warrant operation a da Barangay Chairman Felimon Balgona iti Brgy. Estancia iti ili ti Piddig ken ni Mr. Remarton Ocampo a maysa a barangay tanod iti Brgy. 26 ditoy siudad ti Laoag.
Segun ken ni Perera, nawaya-wayaan ni Balgona kalpasan a naamoan a peke ti granada a nasukimat dagiti otoridad pagtaengan na.
Kuna na a basar iti palawag dagiti kameng ti PNP iti ili ti Piddig ket lighter nga addaan ti butane fuel ti nakumpiskar ken saan a granada.
Inbatad na a gapu iti daytoy ket nawaya-wawayaan ni kapitan Balgona babaen iti panagpiyansa da iti 100,000 a pisos.
Mainaig iti daytoy, inpakaammo ni Perera a napiyansaan met iti 320,000 a pisos ni Ocampo kalpasan a nakasoan gapu iti pannakaduktal dagiti otoridad ti iligal a droga ken paltog iti pagtaengan na iti naisayangkat a search warrant operation.
Kabayatanna, ti pannakawaya-waya dagiti dua a supporters ti team Fariñas ket napasamak kalpasan ti naiyuswat a March for Peaceful elections.
