LAOAG CITY – Inyetnag ti Korte idiay Dili, Timor Leste ti house arrest ken ni dati a Negros Oriental Rep. Arnolfo “Arnie” Teves Jr. gapu ta maibilang daytoy kas “flight risk” kabayatan a madengdengngeg ti extradition case-na.
Segun ken ni Department of Justice Undersecretary Raul Vasquez, nupay naka-house arrest ni Teves ket bantay-sarado dagiti pulis kenkuana.
Basar kadagiti impormasion, inrakurak ti Court of Appeals a simmangpet iti nasao a pagilian ni Teves babaen iti private plane idi Abril 2023.
Agnanaed ti napadisi nga opisial iti maysa a pagtaengan nga addaan ti binulan nga abang a $10,000 wenno sumurok a kagudua a milyon a pisos kaduana ti asawa ken dagiti annakna.
Adda pay ti maipagarup a 20 a trabahador ni Teves a pakairamanan ti 10 a Pilipino ken 10 a Timorese.
Kinumpirmaran met ni Atty. Ferdinand Topacio, ti Abugado ni Teves, ti house arrest iti klientena ngem naglikudanna a saan a gapu iti flight risk ti dati nga opisial.
Maibasar iti Department of Justice, agtultuloy ti panagdengngeg para iti extradition ni Teves tapno naan-anayen a makaawid ken mapagsungbat dagiti sangsangoenna a kaso.
Maipalagip a napadisi ni Teves iti Kamara idi Agosto 2023 gapu iti nagsasaruno a saan a panagatendar kadagiti responsibilidadna kalpasan ti alegasion kenkuana a maipagarup nga akin-utek iti panangpapatay ken ni Negros Oriental Gov. Roel Degamo a nakatayan met ti lima a dadduma pay idi Marso 2023.
