LAOAG CITY – Nagkedked ti dati a Court Sheriff a ni Abe Andres kalpasan a nairaman daytoy iti listaan kas maysa a testigo iti impeachment trial kontra ken ni Vice President Sara Duterte.
Ni Andres ti dati a court sheriff a napagsasaritaan iti kallabes kalpasan a dinangran ni Vice President Sara idi Mayor pay laeng daytoy ti Davao City.
Inbatad ni Andres nga awan ti planona a makipaset iti aniaman a pakasaritaan ti ”Partisan politics.”
Inpettengna nga iti agdama ket maysa isuna nga Human Resource Management Officer iti Korte Suprema ket kas maysa a second-level official nasken laeng nga agtalinaed daytoy nga awan ti pabpaboranna kadagiti sarsarita mainaig iti pulitika.
Maipalagip a basar iti pre-trial brief nga inpila ti House prosecution panel ket maysa ni Andres kadagiti walo a testigo a manamnama a mangipaay ti testimoniada kontra ken ni Vice President Sara ken karaman pay ti maipagarup a panagpangta iti biag da Presidente Ferdinand Marcos Jr., First Lady Liza Araneta-Marcos ken ti dati nga House Speaker Martin Romualdez.
