LAOAG CITY – Pabor ni Mrs. Terisita Orcino, dati a DepEd District Supervisor iti ili ti San Nicolas ti gakat nga inpila no Sen. Panfilo Lacson seknan iti pannakairaman kas core subject ti good manners and right conduct iti Philippine education system manipod iti kindergarten agingga na iti third-grade levels.
Segun kenni Orcino, saan na a mailawlawag ti dakkel a nagbaliwan dagiti estudyante ita nga henerasyon no ikumpara kadagiti immun-una nga ubbing.
Daytoy ket gapo ta iti agdama ket awanen dagiti panangkablaw wenno panag-excuse a nasayaat dagiti ubbing.
Inbatad na a no mamulagatan laeng dagiti ubbing idi ket ammo dan a nakabasol da ngem iti agdama ket rumwar lattan dagitoy iti klase ken sumungbat da pay kadagiti mamaestra da kasta pay nga adda dagiti agus-usar ti cellphone.
Patyen ni Orcino a maysa kadagiti rason iti daytoy ket ti panangkunsintir dagiti nagannak nga uray bassit laeng a pannabaot dagiti ubbing ket maireklamon dagiti mangisursuro.
Inpetteng na a saan a pakabasolan ti agbaut kadagiti ubbing nangruna no nagbasol daytoy, saan laketdi a mapagdara ken saan nga iti kasakitan a parte ti bagi ti bauten da.
Innayon na a marikna laket ti maysa nga ubing ti bassit a baut ken madisiplinaan daytoy ngem no nakaro ket saan a naikalintegan.
