LAOAG CITY – Kinumpirmaran ti Bureau of Immigration (BI) a nakasublin ditoy Pilipinas ni dati a Department of Public Works and Highways (DPWH) Secretary Manuel Bonoan manipud idiay Taipei, Taiwan.
Iti maysa a rakurak, inbatad ti Bureau of Immigration a simmangpet ni Bonoan iti Ninoy Aquino International Airport (NAIA) ita nga aldaw ti Domingo, Enero 18 a naglugan ti maysa a China Airlines manipud iti nasao a pagilian.
Malaksid iti daytoy ket awan ti kadua ti dati a sekretario idi nagsubli daytoy ditoy Pilipinas ken insigida nga inpakaammo ni Immigration Commissioner Joel Anthony Viado iti Department of Justice (DOJ) ti panagawid ni Bonoan para iti agtultuloy nga addang iti panangtalantan kadagiti isyu nga adda ti pakainaiganna iti flood-control anomalies.
Maipalagip a naikabil iti Bureau of Immigration Lookout Bulletin Order ni Bonoan maiyallubog iti pammilin ti Department of Justice gapu kadagiti nasao nga isyu.
Kabayatanna, namnamaen ita ti Independent Commission on Infrastructure (ICI) a ti panagsubli ni Bonoan ket ad-adda a makatulong pay kadagiti imbestigasionda.
Immuna iti daytoy, inrekomendar ti komision ti panangipila kadagiti kaso kriminal ken administratibo kontra iti dati a sekretario mainaig iti P95 milyon a balor ti flood control projects idiay Bocaue, Bulacan.
