LAOAG CITY – Paim-imbestigaran metten ti Department of Justice (DOJ) ni dati a Department of Public Works and Highways (DPWH) Secretary ken itan Senador Mark Villar gapu iti maibagbaga a binilyon a pisos a proyekto daytoy iti gobierno nga addaan ti conflict of interest.
Inbatad ni Justice Secretary Crispin Remulla, sumurok 18 a bilyon a pisos ti balor ti proyekto idiay Las Piñas ti naala ti maysa a contractor a kasinsin ti Senador.
Kabayatanna, imbestigaran pay ti Department of Justice ti nasao a contractor mainaig kadagiti naala daytoy a proyekto idi adda iti posision pay laeng ti Senador.
Inlawlawag ni Remulla, saan laeng a kontrata iti flood control projects ti naala ti nasao a kabagian ni Villar pakairamanan metten dagiti pasdek, kalsada, pagadalan ken dadduma pay.
Kunana a karaman a paimbestigaran ti Department of Justice ti ina ni Senador Mark Villar a ni dati a Senador Cynthia Villar ken ti kabsatna a ni Senador Camille Villar.
Innayonna nga agtultuloy ti panangberipikarda kadagiti report a maaw-awatda mainaig iti pannakairaman ti nasao a pamilia.
