LAOAG CITY – Inbatad ni Ombudsman Jesus Crispin Remulla a nabayag unayen ti panagtalinaed ni dati a Department of Public Works and Highways (DPWH) secretary Manual Bonoan idiay Estados Unidos ken mabalin a maideportar daytoyen.
Gapu iti daytoy, kuna ni Remulla a kasayaatan no boluntaryo laengen nga agsubli ni Bonoan ditoy pagilian
Kuna na a no mamonitor ti U.S. Embassy, wenno ti American State Department nga overstaying ni Bonoan ket dakkel ti posibilidad na nga ideportar da daytoy uray nagaplikar para iti pannakaiyalud-od ti panagtalinaed na idiay Estados Unidos.
Maipalagip a ti Independent Commission for Infrastructure (ICI) ket nangisubmitir iti Ombudsman idi pay Disiembre 2025 kadagiti ebidensia kontra kadagiti indibidual a pakairamanan ti Bonoan, a kunada a mabalin nga agtungpal iti ad-adu pay a kaso mainaig iti flood control scandal.
Kabayatanna, inbatad ni Palace Press Officer Undersecretary Claire Castro a saan a makapagsarita para ken ni Bonoan kalpasan a nasaludusd no adda ti aniaman nga inkari ti dati a mangidaulo ti Department of Public Works and Highways ken ni Presidente Ferdinnd Marcos Jr. gapu ta inkari na idi ti panagsubli na koma ditoy Pilipinas idi disyembre ti napalabas a tawen.
