LAOAG CITY – Nangiwayat ti search operation dagiti kameng ti PNP Laoag, PNP Bacarra ken Philippine Drug Enforcement Unit iti pagtaengan ti dati a drug surrenderee iti Brgy. 5 iti ili a Bacarra.
Nabigbig ti subject ti operasyon a ni Jerrywest Banaag a.k.a “West” a residente iti nasao a barangay.
Nakarekobre dagiti otoridad iti dua a sachet a naglaon ti maipagarup a shabu.
Basar iti imbestigasyon, naala ti maysa a sachet a maipagarup a shabu iti mismo a wallet ni Banaag idinto a naala iti maysa pay a sachet iti kaha ti sigarilyo a nabirukan iti kwarto ti subject ti operasyon.
No pay kasta inpetteng ni Banaag a naimula dagiti nakumpsikar kenkuana, kunana a pinuersar dagiti otoridad isuna a pinarwar ken dagus a sinerrek da ti pagtaengan da.
Inbatad na a saan na a kukua iti naala a kaha ti sigarilyo a nakaikargaan ti maysa a sachet ti shabu gapu ta sabali a brand ti sigarilyo na.
Kabayatanna, kinumpirmaran ni P.Chief Master Sergeant Harold Nicholas iti Ilocos Norte Police Provincial Office nga adda iti drug watch list ti PDEU, Provincial Intelligence Branch ken PNP Bacarra ni Banaag.
Inbatad ni Nicholas a naiwayat nga imun-unan iti test buy kenni Banaag ngem saan daytoy a nagpakita iti transaksyon ken sabali iti inbaon na a nangited iti nagatang nga iligal a droga.
Naamoan a dati a dispatcher/driver iti maysa bus company ni Banaag no sadinno a naggapo idiay Manila dagiti ilegal a droga.
