LAOAG CITY – Maibalud ti dati a French President a ni Nicolas Sarkozy gapu iti finance conspiracy.
Ni Sarkozy ti maibilang a kaunaan a dati a French President a maipisok iti pagbaludan kagiddan ti panangrugi ti lima a tawen a pannakasentensiana gapu iti pannakikunsabona ti pundo iti kampania ti eleksion nga adda ti nausar a kuarta manipud ken ni dati a Libyan dictator Muammar Gaddafi.
Nagakem ni Sarkozy kas Presidente manipud idi 2007 agingga iti 2012 no sadinno nga immapela isuna iti pannakaibaludna iti bassit a pagbaludan iti La Santé prison.
Sumurok 100 a tattao ti nagpukkaw ti “Nicolas!” kagiddan ti panagtalawna iti maika-16 a distrito ti Paris kaduana ti asawana a ni Carla Bruni-Sarkozy.
Mainaig iti daytoy, nagpanawagan dagiti dua nga annak ni Nicolas nga isuda Louis ken Pierre kadagiti mangsupsuporta kadakuada a mangipadanon ti suporta ken panagayat iti pamiliada.
Kabayatanna, kalikagum ni Sarkozy ti “no special treatment” iti La Santé prison uray naikabil daytoy iti isolation section para iti kinatalgedna ken naibalud met ditoy dagiti sumangsango iti iligal a droga ken nakumbiktaran para iti terror offences.
