LAOAG CITY – Mawaya-wayaan ni dati a French President Nicolas Sarkozy iti pagbaludan kalpasan ti 3 a lawas manipud iti lima a tawen a pannakaibaludna gapu iti criminal conspiracy.
Nupay kasta, maipadalan daytoy iti naiget a judicial supervision ken pannakaipawil a tumalaw idiay France.
Nasentensiaan ti lima a tawen ti dati a Presidente nga agtawen ti 70 idi Oktubre 21 gapu iti pannakikunsabona iti pundo iti kampaniana iti eleksion idi 2007 nga addaan ti kuarta manipud iti dati a Libyan dictator Muammar Gaddafi.
Gapu iti daytoy, insigida a nangipila dagiti abugadona ti panangkiddaw iti pannakawaya-wayana ken panangapelada ti trial inton Marso iti sumaruno a tawen.
Inladawan ni Sarkozy ti nagbalin a kasasaadna kabayatan ti kaaddana iti solitary confinement a makapakapsot ken bangungot kenkuana.
Inrekomendar ni Public prosecutor Damien Brunet a mapatgan ti kiddaw ni Sarkozy a mawaya-wayaan ngem mapawilan ti dati a Presidente a maki-contact iti dadduma pay a saksi kas ti maaw-awagan a “Libyan dossier.”
Mainaig iti daytoy, inpetteng ni Sarkozy nga awan ti aniaman a dakes nga ar-aramidenna ken saan a pulos a dimmawat ti kuarta ken ni Gaddafi ken saanna pulos nga admitaren ti banag a saanna met nga inaramid.
Naammoan a nagatendar iti korte ti asawa ni Sarkozy a ni Carla Bruni-Sarkozy a maysa a singer ken model pakairamanan ti dua nga annak ti dati a Presidente.
Kabayatanna, ni Sarkozy ti kaunaan a dati a Presidente idiay France a naibalud sipod idi World War Two Nazi collaborationist leader Philippe Pétain a naibalud gapu iti treason idi 1945.
