LAOAG CITY – Kinumpimaran ni Atty. Diosdado Araos, hepe ti National Bureau of Investigation (NBI) ditoy ciudad ti Laoag ti pannakatiliw ti lalaki gapo iti panaglaklako na ti daga a maipagarop nga awan ti umiso a dokumento na.
Nabigbig ti suspek a ni Mr. Gil Pascual, dati a kameng ti Provincial Security Group ken residente iti Barangay Araniw ditoy ciudad ti Laoag.
Segun kenni Araos, nabayagen nga adda ti reklamo mainaig iti panaglako ti daga ti suspek nga awan ti umiso a dokumento na.
Inbatad na a natiliw ti suspek babaen iti entrapment operation no sadinno nga agbayad ti babai a nagreklamo ti 200 a ribo a pisos iti suspek ken ditoy a naarestar.
Naamoan a ti gatgatangen ti babai a daga ket agbalor ti nasurok maysa a milyon a pisos.
Mainaig iti daytoy, kuna ni Araos nga addan ti ummuna a naglakoan ni Pascual.
Kunana nga adda ti panagsarita ti ummuna a gimmatang ti daga ken ti babai a nagreklamoken ditoy a naduktalan da nga agpada ti lot number ken tax declaration number ti lote.
Kabayatanna, inpetteng met ni Pascual a lehitimo ti ilaklako na a lote ken kunana a ti kaudian nga ilaklako na ket tinawid na manipud iti lolo na.
Inlawlawag ni Pascual nga amin a daga nga ilaklako na ket adda ti umiso a dokumento na ken nakainagan kenkuana.
Innayon na nga idi inyawat na ti dokumento a mangipakpakita ti kasuratan seknan iti ummuna nga inbayad na ken idi inawat na ti kwarta ken ditoy a tiniliw dagiti kameng ti NBI.
