LAOAG CITY – Inpakaammo da Barangay Health Workers Femia Villanueva ken Fae Benito pakairamanan ni Barangay Tanod Loreto Paet Jr. iti Brgy. Davila iti ili ti Pasuquin a maipagarup a nagpasugal ni dati a Brgy. Chairman Elviro Agoo iti uneg mismo ti Barangay Hall-da.
Segun kadakuada, kabayatan ti kaaddada iti uneg ti Barangay Hall ket simrek ni dati a Kapitan Agoo kaduana dagiti saanen a nabigbig nga indibidual tapno agpalamiis gapu ta adda ti air conditioner ti Barangay Hall-da.
Inbatadda a kalpasan ti sumagmamano a minuto ket nagkiddawda ti lamisaan kadakuada banag a dagusda met a pinatgan rason a pinunasanda pay daytoy gapu ta narugit.
Nupay kasta, inpalgakda a saanda a ninamnama nga iruarda metten ti baraha ken pityas a nausar a kuarta iti panagsusugalda.
Inlawlawagda nga iti damo ket inpagarupda nga agpamerienda laeng dagitoy kadakuada ngem sabali metten ti aramidenda iti uneg ti Barangay Hall.
Innayonda nga iti baet ti gagemda a malappedan ti ar-aramiden da dati a Kapitan ken dagiti kakaduana ket awanen ti naaramidanda pay no diket nagulimekda lattan.
Naammoan a nagturong da dati a Brgy. Chairman Agoo, agasawa a Dr. Ranada ken dadduma pay nga indibidual iti Barangay Hall kabayatan ti panagur-urayda iti misa iti Padre Pio.
Mainaig iti daytoy, segun ken ni Brgy. Chairman Richard Guira, agdama a Kapitan iti Brgy. Davila iti ili ti Pasuquin nga adda isuna pay laeng idiay Hawaii idi napasamak iti maipagarup a panagpasugal ni dati a Brgy. Chairman Agoo.
Kunana nga apaman a nakaawid ditoy pagilian ket dagusna a kinasarita dagiti padana nga opisial ti barangay maipanggep iti daytoy a banag.
Inbatadna nga inpakaammona metten iti Department of the Interior and Local Government iti ili ti Pasuquin ti nasao nga isyu.
Kabayatanna, inlawlawag ni dati a Kapitan Agoo a saan a karaman isuna iti nagay-ayam ti tong-its iti uneg ti Barangay Hall ngem kunana a pampalipas orasda laeng daytoy ken no aniaman ti agbalin a desision ti barangay ket idanonna kadagiti maseknan nga indibidual tapno agsungbat.
