LAOAG CITY – Balligi a naarestar ti dati a Kapitan iti Anti-Illegal Drug Buy-bust Operation iti Barangay 28 ditoy siudad ti Laoag.
Nabigbig ti suspek a ni Edmon Domingo, agtawen ti 53, mannalon ken residente ti Barangay 56-B Bacsil South ditoy siudad ti Laoag.
Natiliw ti suspek kalpasan a maipagarup a naglako ti uppat nga heat sealed transparent plastic sachet a naglaon ti maatap a shabu a nabungon ti papel iti maysa a police poseur-buyer.
Malaksid iti daytoy, nakumpiskar pay manipud iti suspek ti walo nga heat sealed transparent plastic sachet a naglaon ti mapapati a shabu ken ti uppat a ribu a pisos a nausar kas buy-bust money.
Mainaig iti daytoy, inadmitir ti suspek nga agus-usar daytoy ti iligal a droga ngem naglikudanna a saan nga aglaklako ti shabu no sadinno ti naudi a nagusar isuna iti iligal a droga ket idi laeng Sabado.
Naammoan a mapan koma gumatang ti goma ti motorsiklo ti suspek idi matiliw dagiti otoridad.
Kabayatanna, maibilang ti dati a Kapitan kas Street Level Individual ken nabayagen nga imonmonitor isuna dagiti otoridad.
