LAOAG CITY – Inlawlawag ni Dra. Estela Rivera iti Piddig District Hospital no apay a ti dati a kumbento ti temporaryo a nagikabilan da kadagiti pasyente da.
Segun kenni Rivera, manarimaan ti pannaka-renovate ti nasao nga ospital rason a nakisarita da kadagiti maseknan nga isu pay laeng ti usaren da.
Inadmitir na a sakbay ti pannaka-renovate ti nasao nga ospital ket awan ti naituding a temporaryo kuma pay laeng nga usaren da gapo ta ti pondo ket para laeng iti pannakatarimaan ti balay-pagagasan.
Inbatad ni Rivera a gapo ta kastoy ti sitwasyon da ket siguradwen da nga awan dagiti makaakar a saksakit iti nasao a temporaryo a napagbalin nga ospital gapo ta open area daytoy.
Karaman ti saan da pay nga awaten ket dagiti aganak nga inna.
Naamoan a narugyan ti renovation ti Piddig District Hospital idi bulan ti Hulyo ita a tawen.
Ti napagbalin a temporaryo nga ospital ket dati a kumbento ken napagbalin a simbaan sakbay a nagbalin met a balay pagagasan iti agdama.
