LAOAG CITY – Napaneknekan a guilty beyond reasonable doubt ti Sandiganbayan ni dati a Maguindanao Governor Datu Sajid Ampatuan iti kaso a graft ken malversation ti public funds nga adda ti pakainaiganna iti P400 million a pundo a nailatang para iti pannakaipasdek ti 22 a farm to market roads idi 2009.
Iti 66 a panid a desision ti anti-graft court a naiburay idi Lunes, pinatawan ti Sandiganbayan ni Ampatuan ti agingga iti 40 a tawen a pannakaibalod iti kaso a malversation ken addaan ti multa ken restitution nga agbalor ti PHP786 million.
Napatawan pay ti agingga iti 12 a tawen para iti nagsina a kaso ti panaglabsing iti Anti-Graft and Corrupt Practices Act.
Dua met kadagiti agpada nga akusado ni Ampatuan, ti Provincial Treasurer a ni Oscar Bandila ken Provincial Accountant a ni John Dollosa ket nagtalinaed a nawaya.
Ti maikapat nga agpada nga akusado a Provincial Auditor a ni Danny Calib ket winaswas ti Korte.
Basar iti prosekusion, na-download ni Bandila ti balor babaen iti cash advance ngem napaay a nagsubmitir kadagiti documentary reports ken liquidation documents maipanggep kadagiti disbursement.
Ti akusado a ni Ampatuan ket inusarna ti posisionna ken wagas a maikanniwas iti paglintegan no sadinno nga inusarna ti gatad a nailatang para iti nasao a proyekto.
