LAOAG CITY – Naimbitaran dagiti dati a mahistrado ti Korte Suprema iti panagdengngeg iti Senate Impeachment Court tapno mangibingay dagiti interpretasionda mainaig iti probision ti 1987 Constitution a masapul ti two-thirds vote manipud kadagiti amin a miembro ti Senate para iti conviction.
Inpetteng ni dati a Supreme Court Chief Justice Hilario Davide Jr. a ti pagibasaran iti panangkuwenta ti two-thirds vote iti impeachment trial ket masapol ti bilang dagiti senador a kawalipikado nga agbotos, ken saan nga awtomatiko a manipud iti 24 a miembro ti Senado.
Mainaig iti daytoy, saan a personal a nagatendar ni Davide iti Impeachment Court ngem nangisubmitir daytoy ti written legal memorandum.
Iti baet daytoy, inpetteng met ni dati a Supreme Court Chief Justice Artemio Panganiban ti takderna iti posibilidadna nga agbotos dagiti senador a saan a nakaatendar kadagiti panagdengngeg ti impeachment trial.
Inbatad met ni dati a Supreme Court Associate Justice Adolfo Azcuna a mabalin nga agbotos ti maysa a senator-judge uray man pay saan daytoy a nakaatendar kadagiti panagdengngeg ti impeachment trial.
Segun kenkuana, no mamati ti maysa a senador a kabaelanna ti makaited ti patas ken awan ti pabpaboranna a desision a nakabasar iti rekord ti kaso, iti Konstitusion ken iti linteg ket mabalin daytoy nga agbotos iti impeachment proceedings.
Malaksid kadagiti immunan a nadakamat nga opinion dagiti dati a mahistrado, inlawlawag met ni retired Supreme Court Associate Justice Reynato Puno a ti bilang ti botos para iti impeachment conviction ket nakabasar iti “two-thirds of all the Members of the Senate.”
Inpanagetgetna a gapu ta fraction ti maararamat iti Konstitusion, mabalin a mabaliwan ti kasapulan a bilang a botos depende iti pakabukelan a bilang dagiti miembro ti Senado.
