Nagturong dagiti kameng ti PNP Laoag, Criminal Investigation and Detection Group (CIDG), ken City Social Welfare Development Office (CSWDO) iti pagtaengan ti dati a mayor Chevylle Fariñas iti Brgy. Vira ditoy siudad ti Laoag.
Daytoy ket tapno maberipikaran ti alegasyon a maipagarup a saan nga it-ited ti dati a mayor ti sweldo dagiti katulong da iti balay.
Basar iti nakalap nga impormasyon ti Bombo Radyo Laoag, maipagarup a nagreport iti pulisya ti nagannak dagiti katulong a tubo iti probinsya ti Cagayan seknan ti saan a pannakaited ti sweldo da ken nu agserserbi pay laeng dagitoy iti pamilya Fariñas.
Rumrumuar nga agsipod itay napan a tawen ket maipagarop a saanen a nakaawat ti sweldo dagiti katulong, awan ti day-off da ken saanda a mapalubusan a rumuar iti pagtaengan ti pamilya Fariñas.
Naamoan a dagiti katulong wenno helper ti pamilya Fariñas ket dua nga agtawen ti 19, dua nga agtawen ti 14, ken maysa nga agtawen 18.
Kabayatanna, inbatad ni PLt. Col. Amador Quicho, ti Chief of police iti PNP Laoag nga iti panagturong ti kameng ti CSWDO iti mismo nga uneg ti pagtaengan ket dagiti Fariñas ket maipagarup nga awanen dagiti katulong gapu ta dagitoy ket maipagarop a naisubli dan iti probinsya ti Cagayan.
Nu pay kasta, inbatad na a makikoordoninar ti CSWDO iti Department of Social Welfare and Development iti probinsya ti Cayagan para iti adadu pay a beripikasyon seknan ti nasao nga alegasyon kontra iti dati a mayor ditoy siudad ti Laoag.
