LAOAG CITY – Inbatad ni dati a Mayor Marinette Gamboa iti ili ti Dingras a nakasagana a mangsango iti iti kaso na a murder.
Daytoy ket mainaig pay laeng ti pannakaitudo na a mastermind iti pannakapapatay ni dati nga Ilocos Norte Electric Cooperative President Lorenzo Rey Ruiz idi 2009.
Segun kenni Gamboa, patien na a ti kaso a sangsangwen na ket adda ti pakainaigan na iti politika.
Mainaig iti daytoy, inbatad na a maragsakan gapu ta pinatgan ti Court of Appeals ti resolusyon para iti kiddaw da a mapalubusan nga agpiyansa para iti temporario a pannakawaya-waya ken inpetteng na a nadalos ti konsensya na.
Kabayatanna, dakkel ti pammati ni Gamboa a mangabak iti kaso na gapo ta awan ti napigsa nga ebidensya ti kampo ni Ruiz kontra kenkuana.
Maipalagip a nagpiyansa ti 400 a ribo a pisos ni Gamboa para iti temporaryo a pannakawaya-waya na.
Ni Gamboa ket ummunan a natiliw idiay Calamba, Laguna babaen kadagiti kameng ti National Capital Region Police Office (NCRPO) babaen ti bileg ti warrant of arrest nga inparuk-at ni Judge Felix Salvador gapu iti kaso na a murder.
