LAOAG CITY – Naragsak a nangirakurak ni Atty. Joel Garcia, maysa kadagiti legal counsel ni dati a Mayor Marinette Gamboa iti ili ti Dingras ti aplikasyon da para iti pannakaipalubos nga agpiyansa ti kliyente da.
Inbatad ni Garcia nga itay laeng aldaw ket inaprubaran ni
Hon. Felix Salvador iti Regional Trial Court (RTC) Branch 17 iti ciudad ti Batac ti resolusyon para iti kiddaw da a mapalubusan nga agpiyansa ni Gamboa.
Segun ken ni Garcia, nairekomendar ti 400 a ribo a pisos a pagpiyansa ni Gamboa para iti temporaryo a pannakawaya-waya na.
Maipalagip a natiliw ni Gamboa idiay Calamba, Laguna babaen kadagiti kameng ti National Capital Region Police Office (NCRPO) babaen ti bileg ti warrant of arrest nga inparuk-at ni Salvador gapu iti kaso na a murder.
Ni Gamboa ket maak-akusaran a mastermind iti pannakapapatay ni dati nga Ilocos Norte Electric Cooperative President Lorenzo Rey Ruiz idi 2009.
