LAOAG CITY – Sinungbatan ni dati a Mayor Mike Hernado iti ili ti San Nicolas ti isyu mainaig iti utang ti lokal a gobierno bayat ti administrasyon na.
Kunana a saan koman a sumungbat ngem maipagarop a paulit-ulit nga isu ti ipadpadamag ni agdama a Mayor Edmar Vincent Bonoan agingga diay isla ti Hawaii iti panagturong na iti lugar para iti panagfiesta iti ili ti San Nicolas.
Inlawlawagna a ti 150 a milyon a pisos nga utang ti lokal a gobierno ket nabayadanen ti dua a tawen nga ammortization ken principal na a saan a nadnadlaw ti Local Government Unit ken awan ti naapektaran iti daytoy.
Innayonna a ti rason no apay a ginatang da ti lote babaen ti inutang ti ili da ket tapno adda ti investment ken mapapintas met ti municipyo.
Patien na a rumbeng laeng a mapapintas ti municipyo tapno nataltalged ti pagyanan dagiti empleado ken dagiti tattao ti San Nicolas nangruna ita ket agsasaruno dagiti mapaspasamak a gingined.
Innayon na a saanna met a baybay-an ti agdama a municipyo no di ket plano na koma a pagbalinen a museum.
Kabayatanna, inlawlawagna pay a ti nakaigatangan ti fiesta fund wennu ti naurnong a kwarta dagiti balikbayan bayat ti administrasyon na ket ti pick-up ken van a daytoy ket immuna a naikunsoltar iti konseho sakbay a nagatang ken amin daytoy ket accounted.
