LAOAG CITY – Inlawlawag ni dati a Laoag City Mayor Roger Fariñas ti napasamak a komosyon iti Brgy. Mangato ditoy siudad ti Laoag.
Iti inyuswat a press conference ti Team Fariñas, kuna ni dati a mayor Fariñas nga adda ti panaghouse-to-house da iti Darayday-Buttong road kadua na da Congresswoman Ria Fariñas.
Inbatad na a ti anak na a ni Konsehal RK Fariñas ket iti met Barangay Mangato A ken B.
Kuna na nga idi mapan dumanon iti Barangay Mangato ket nakita na a naruay dagiti tattao iti maysa a naaladan a compound ni agpaidasig a konsehal Bryan Alcid.
Inbunannag na nga idi nakaasideg iti nasao a lugar ket nakita na a nakarikep ti gate ken agur-uray dagiti tattao a sumrek.
Inbatad na a nadakamat kenkuana ti maysa a babai nga adda da iti lugar tapno umawat ti kwarta nga aggapo ken ni Sandro Marcos, ti maysa kadagiti agpaidasig a congressman iti primero distrito.
Gapu iti daytoy, kuna na a nagkatok iti naminpat a daras iti gate ken dita nga adda ti nanglukat ken nakastrek kageddan ti panangivideo na ti pasamak iti uneg ti naaladan.
Segun ken ni Fariñas, posible nga adda dagiti saan a nakailasin kenkuana apaman a nakastrek ngem adda met dagiti nangablaaw kenkuana ken nakisarita pay kadagitoy.
Mainaig iti daytoy, kuna ni Fariñas a kalpasan a nakisarsarita ket ginandat na met laeng ti rumuar a dagus ngem kellaat nga adda ti babai a nangirikep iti gate.
Kabayatanna, inbunannag ti dati a mayor a nu bilang saan a nakaruar iti compound da Alcid ket posible nga isuna ti napupok a nadangran.
Ipakaammo ni Fariñas nga awan ti panagsarsarita da ken ni Mrs. Jojami Alcid ken isu ti nangirikep ti gate bayat nga adda iti uneg rason a pinilit na met ti rimuar.
Immun-unan nga inpakaammo ni Fariñas nga idi nakaruar iti compound ket dita a nasabat da ti grupo ni Bise Mayor Vicentito Lazo ken adda pay ti panangikasa ti paltog ti kabsat daytoy a ni Ret. Lt. Gen. Moro Lazo, banag a naglikudan iti nasao a grupo.
Mainaig iti daytoy, kuna ti dati a mayor a saan a nasken a maakusaran a kriminal babaen ken ni Lazo gapu ta awan ti pammaneknek ken awan ti aniaman a krimen nga inaramid na.
