LAOAG CITY – Ballaigi a naarestar dagiti otoridad ti dati a Mayor ti Dingras, Ilocos Norte a ni Marynette Gamboa idiay Laguna.
Sumangsango ni Gamboa iti kaso a murder gapu iti pannakatay ni dati a Presidente ti Ilocos Norte Electric Cooperative a ni Lorenzo Rey Ruiz idi 2009.
Basar iti imbestigasion, rumrummuar a ni Gamboa ti mastermind iti kaso a pannakapapatay ni Ruiz.
Gapu iti daytoy, naikabil ti naganna iti Top 2 Most Wanted Person ditoy probinsia ti Ilocos Norte.
Ti arrest warrant kontra iti dati a Mayor ket impaulog ti Batac City Regional Trial Court idi Hulio 11, 2022 ken awan ti nairekomendar a piyansa.
Malaksid iti daytoy, naakusaran met ni Gamboa nga isu ti mastermind iti panang-ambush da Dingras Mayor-elect Jeffrey Saguid ken Sangguniang Panlalawigan Board Member Robert Castro idi Disiembre 2009.
Immunan a kinuna ti dati a Mayor nga adu a nabileg a politiko ditoy probinsia ti agkalikagum a mangikkat kenkuana iti puestona.
Kabayatanna, naglikudanna nga adda pakainaiganna kadagiti alegasion a naipabasol kenkuana.
