LAOAG CITY – Boluntaryo a simmuko iti Philippine National Police iti ili ti Adams ti dati a miembro ti Communist Terrorist Group (CTG).
Segun kenni Police Col Julius Suriben, ti Provincial Director ti Ilocos Norte Police Provincial Office (INPPO), ti simmuko ket agtawen ti 50, naasawaan ken maysa a mannalon, tubo iti ili ti Dumalneg ngem agdama nga agnanaed iti ili ti Adams.
Kunana a karaman iti insuko ti maseknan ket ti paltog na a kinali na pay iti nangidulinan na.
Inbatad na a daytoy ket dati a miembro ti makakatiggid a grupo a dati nga agop-operar iti Ilocos Norte, ciudad ti Baguio, Kalinga, Apayao ken Cagayan.
Mainaig iti daytoy, kuna met ni Police Major Jephre Taccad, ti pannakangiwat ti Ilocos Norte Police Provincial Office a kimmappeng iti rebelde a grupo ken addaan ti nagan a “Ka Mon” ti simmuko ket nagserbi kas intelligence officer iti New Peoples Army ken naisyuan ti MB-59 M 1 garand riffle nga addan ti 120 a bala.
Kalpasan ti sumagmamano a tawen a panagsagaba iti sidong ti rebelde a grupo ket nagdesisyon nga agbalbaliw ken naglibas ken nagnaed iti ili ti Adams.
Kabayatanna, kunana a kalpasan a simmuko daytoy ket maiyendorso it nagduduma nga ahensya ken iti lokal a gobierno iti Adams para iti maipaay kenkuana a tulong.
