LAOAG CITY – Boluntaryo a simmuko kadagiti otoridad ti dati a miembro ti New People’s Army iti ili ti Vintar.
Ti simmuko ket agtawen ti 59 ken residente iti Brgy. Canaam iti nasao nga ili.
Segun ken ni PMaj. Reynaldo Dalipias, hepe ti PNP-Vintar, bayat ti panagsursor da kadagiti nagduduma a barangay ket boluntaryo nga immasideg ti dati a rebelde tapno sumuko.
Inbatad ni Dalipias a ti dati a rebelde a nakipagpartisipar kadagiti operasyon ti rebelde a grupo idi 1990’s iti Aparri, Cagayan.
Kuna na a tawen 2000 a bimmaba manipod iti kuta da ken idi kalman a naan-anay a simmuko kadagiti otoridad.
Karaman nga insuko ti dati a rebelde ti ikot na a 12-gauge shotgun.
Mainaig iti daytoy, inpakaammo ti hepe a naipresentar ti dati a rebelde iti INPPO ken manamnama a maipresentar iti lokal a gobierno iti ili ti Vintar tapno maipaayan ti naan-anay a tulong.
