LAOAG CITY – Naarestaren ni dati a Negros Oriental Representative Arnolfo “Arnie” Teves Jr. idiay Timor-Leste.
Daytoy ti kinumpirmaran ti Department of Justice (DOJ).
Sumangsango ni Teves ti kaso a murder, frustrated murder ken attempted murder gapu ta isuna ti maitudtudo a mastermind iti pannakapapatay ni Negros Oriental Governor Roel Degamo idi Marso 4, 2023.
Maipalagip a kalpasan ti insidente ket napan naglemmeng ni Teves idiay Timor-Leste no sadinno a ginandat na ti mangala ti asylum ngem napaay.
Malaksid iti panangpatay ken ni Degamo ket nakasoan pay daytoy iti pannakatay iti tallo nga indibidual idiay Negros Oriental idi 2019.
Idi Agosto 2023 ket naideklarar karaman ti 11 a sabsabali pay kas terorista gapu kadagiti nakainaigan na a pammapatay ken harassments idiay Negros Oriental.
Idi Agosto ket inikkat ti kamara de representantes gapu iti disorderly conduct ken ti naunday a panaglangan uray expired ti travel authority daytoy.
Naikabil met ni Teves iti red notice list ti International Criminal Police Organization (INTERPOL) idi Pebrero.
Ti red notice ket maysa a kiddaw kadagiti otoridad iti intero a lubong tapno matuntun ti paglemlemmengan ti tao nga addaan ti nakapenpen nga extradition tapno sumuko daytoy ken maarestar.
