LAOAG CITY – Nauram ti dati a plantasyon ti kaunasan idiay Maui, Hawaii nga addaan ti kalawa na a nasurok 5,000 acres.
Segun kenni Bombo International Correspondent Manny Pascua idiay Hawaii, ti uram ket nangrugi idi Huwebes, aldaw idiay Hawaii.
Nupay kasta, kuna ni Pascua nga awan ti naireport nga istraktura a nadadael ngem ti kangrunaan a naapektaran ket dagiti linya ti Maui Electric Company.
Agpapan maisursurat ti damag ket saan pay a masinunuo no anya ti namunganayan ti nasao nga uram.
Iti sabali a bangir, dua a landslide ti napasamak idiay Big Island, Hawaii gapo iti awan sarday na a napigsa a tudo a mapaspasaran ti nasao a lugar.
Inbatad ni Pascua a gapo iti daytoy ket maapek-apektaran dagiti Pilipino nga agtrabtrabaho iti nagduduma nga hotel.
Kunana a gubway pay laeng ti napigsa a tudo iti dua a bagyo nga umas-asideg iti nadakamat nga isla.
