LAOAG CITY – Dagus met laeng a nagsubli iti New Jersey ni dati a Presidente Donald Trump kalpasan a simmuko iti Fulton County Jail idiay Atlanta, Georgia gapo iti kaso kriminal.
Daytoy met ti maikapat a criminal case ni Trump kageddan ti kalikagom na manen nga agpaidasig iti eleksyon intono 2024.
Naglugan ni Trump iti private plane na iti papan na iti Georgia ken apaman a nakadanon ket dagus a naiproseso ken naalaan ti mug shot ken nagpyansa ti $200,000.
Kalpasan daytoy ket dagus met laeng a nagsubli ni Trump iti eropuerto.
Iti statement ni Trump kalpasan a nakapanaw iti Fulton County Jail, kunana a maibilang a nakaladladingit nga aldaw para iti Amerika a saan a rumbeng kuma a mapasamak.
Inpetteng na nga awan ti madi nga inaramid na ken ammo ti amin daytoy.
Dinakamat na pay ti dua a Democrats a naabak iti eleksyon ken dagitoy ti inbatad na a nagprotesta iti resulta paritkular kada Hillary Clinton a naabak idi 2016 ken Stacey Abrams a naabak iti governor race idi Georgia idi 2018.
Inawagan pay ni Trump ti mapaspasamak kenkuana kas “election interference” no sadinno inbatad na a mabalbaliktad ti pasamak.
Ummunan a naglikudan ni Trump kadgaiti 23 a kaso a naipila kenkuanan pakairamanan ti racketeering ken false statements, ken kunana a dagiti kaso ket agpapada a politically motivated.
Maipalagip a napilaan ti kaso ni Trump kalpasan ti pananggandat na a baliktaden ti resulta ti eleksyon idi 2020 iti Georgia kalpasan a naabak iti nadakamat nga estado.
