LAOAG CITY – Inpetteng ti International Criminal Court (ICC) prosecutors a ni dati a Presidente Rodrigo Duterte ket kabaelanna ti agatendar iti panagdengngeg iti confirmation of charges para iti maipagarup a crimes against humanity iti war on drugs kalpasan nga inbilang ti maysa a panel dagiti eksperto nga isuna ket fit for legal proceedings.
Basar iti dokumento ti Office of the Prosecutor, ni Duterte ket maibilang nga “unreliable historian” ti salun-atna ken mental a kabaelan ket nakita nga addaan ti kapasidad a maawatan dagiti pammabasol ken ebidensia pakairamanan ti panangipaay ti instructions kadagiti abugadona.
Inbilin ti International Criminal Court ti medical evaluation kalpasan a nagkiddaw ti depensa ti indefinite adjournment idi Agosto gapu iti salun-at ni Duterte.
Nammoan nga uray linappedan ti depensa ti findings, immannugotda kadagiti rekomendasion para iti panangakomodar iti salun-at ti dati a Presidente.
Segun iti depensa, ni Duterte ket addaan ti limitado a short-term memory isut gapuna a narigat kenkuana nga husto a maarisit ti ebidensia wenno mangipaay ti instructions iti abugadona ken agkidkiddaw ti evidentiary hearing tapno arisiten ti ebidensia ti eksperto.
Nagpanawagan dagiti prosecutors a maituloy nga insigida ti panagdengngeg iti confirmation of charges.
