Patien ni Atty. Kidd Castro, Criminal Law Professor iti Northwestern University ditoy siudad ti Laoag a mabalin nga i-rectify ni dati a Presidente Rodrigo Duterte dagiti nagbalin a rakurak na iti QuadComm hearing mainaig iti war on drugs ken extrajudicial killings (EJK) babaen iti administration na.
Segun kenkuana, ti pudno a rason no apay a maisayangkat dagiti senate hearing ket tapno makatulong a mangpadur-as iti lehislasion wenno mapasayaat ti agdama a linteg ditoy Pilipinas gapu ta no awan ti linteg a mangsaklaw maipanggep iti daytoy a kaso, nasken a mangilungalong ti baro.
Innayonna a ti kastoy a hearing nga araramiden ti Senado ket rumbeng a mausar tapno makatulong iti pannakaaramid ti linteg ken saan a para iti panagimbestigar kadagiti kaso.
Kinunana a ti maiwaywayat nga imbestigasion iti quadcommittee ken ni dati a presidente Duterte ket adda dagiti gundaway a maibilang kas incriminating no sadinno mabalin a mapilitan daytoy a nga agsao gapu iti pungtot.
Mainaig iti daytoy, kunana a ti maysa kadagiti mabalin a rason no apay namin-ado a daras a naitantan wenno nasuspenso ti hearing ket tapno mapakalma ti panagbalin nga agresibo ti dati a presidente.
Kabaytanna, kuna ni Atty. Castro a nasaysayaat no dagiti kaso na iti International Criminal Court ket matratar ditoy korte ti pagilian.
