LAOAG CITY – Personal a simmango ni dati a Presidente Rodrigo Duterte iti hues ti International Criminal Court (ICC) iti The Hague ita a Mierkoles, iti umuna a gundaway, para iti maikatlo nga status conference mainaig ti sangsangoenna a kaso iti crimes against humanity.
Daytoy ti immuna a panagparang ti agtawen 81 a lider kalpasan ti sumurok maysa a tawen manipud naudi a nakita ti publiko idi Marso 14, 2025, idi nagatendar daytoy iti pre-trial hearing iti babaen ti online video conference.
Simmango ti dati a presidente iti court room kalpasan nga inlawlawag ni Presiding Judge Joanna Korner ti ICC Trial Chamber III a namnamaen ti korte ti personal a panagatendarna kalpasan nga isubmitir dagiti eksperto ti evalution report daytoy.
Nakapokus ti panagdengngeg iti pannakaipatibker dagiti timetable para iti panagsango dagiti testigo, pannakisinukat ti agsumbangir a partido ti ebidensia, ken dagiti maudi a panagsagana sakbay ti pormal a panagrugi ti panangusig inton Nobiembre 20, 2026.
