LAOAG CITY – Nakalugan ti Philippine Airlines (PAL) nga agturong idiay Manila ni dati a Presidente Rodrigo Duterte kaduana ti anakna a ni Kitty tapno agatendar iti panagdengngeg ti Senate blue ribbon committee maipanggep iti ‘drug war’ inton bigat, aldaw ti Lunes.
Kageddan iti daytoy, kinumpirmaran met ni Senador Ronald “Bato” Dela Rosa ti nasao a panagatendar ni Duterte iti panagdengngeg iti Senado inton Lunes.
Daytoy ket kalpasan a nag-post ni Dela Rosa ti ladawan iti online kaduana ti dati a Presidente, ti partner-na a ni Honeylet Avanceña ken ti dati nga speaker a ni Pantaleon Alvarez iti maysa a dinner.
Inbatad ni Dela Rosa nga inpasigurado kenkuana ni Duterte nga agatendar daytoy iti imbestigasion ti Senate blue ribbon committee.
Maipalagip nga inrakurak ni Senate Minority Leader Aquilino “Koko” Pimentel III a saan a sigurado ti presensia ni Duterte inton bigat gapu ta maipagarup nga agpangpangadua daytoy.
Kuna ni Pimentel a rugian inton Lunes, Oktubre 28, ti imbestigasion ti Senado maipanggep ti panangpatay iti war on drugs ti dati nga administrasion.
Immunan a kiniddaw da Dela Rosa ken Sen. Christopher “Bong” Go iti Senado a mangisayangkat ti probe nga aramiden a parallel iti imbestigasion ti House Quad Committee (Quad Comm).
Malaksid ken ni Duterte, naimbitaran pay iti imbestigasion ti Senado da retired Police Colonel Royina Garma, dati a National Police Commission commissioner Edilberto Leonardo, dati a Senador Leila de Lima, Kerwin Espinosa ken dagiti pamilia dagiti biktima ti drug war.
