LAOAG CITY – Saan nga agatendar ni dati a Presidente Rodrigo Duterte iti imbestigasyon ti House of Representatives quad committee ita nga aldaw, Nobyembre 7 mainaig iti war on drugs ti administrasyon na.
Daytoy ti inbatad ti abogado ni Duterte a ni Atty. Martin Delgra III babaen iti maysa a surat nga inpatulod na iti opisina ni Surigao del Norte 2nd District Rep. Robert Ace Barbers.
Inlawlawag ni Delgra a pinili ti kliyente na a saanen nga agatendar iti panagdengngeg gapu ta maipagarop nga agdudua iti integridad ti quad committee.
Malaksid iti daytoy, gagem pay ti dati a presidente a saan a masayang ti oras ti gobierno ket ti baybayadan a buwis dagiti taxpayers gapu ta nagatendar daytoyen iti panagdengngeg iti senado iti isu metlaeng nga isyu.
