LAOAG CITY – Simmango iti Korte ni dati a South Korean President Yoon Suk Yeol para iti umuna nga aldaw iti kasona a kriminal mainaig iti insurrection chrages kalpasan ti kontrobersial a panangideklararna ti martial law idi Disiembre.
Ni Yoon ket napadisi ken inikkat iti puesto dagiti agpanpanday linteg ita a bulan kalpasan iti panangipatungpalna ti martial law idi Disiembre 3. Nangipatulod isuna dagiti suldado iti National Assembly iti gandat a lappedan ti lehislatura.
Naammoan nga isuna ti kaunaan a nagtugaw a Presidente ti South Korea nga inarestar kabayatan nga adda iti puesto nga uray apag-biit a nawaya-wayaan gapu iti procedural issues.
Iti panaglukat iti panangtingiting ti Seoul Central District Court, nasaludsod ken ni Yoon dagiti hues mainaig iti personal nga impormasion.
Paayaban ti Korte ti dua a military officers kas saksi pakairamanan ti opisial a nangibaga nga inbilin kadakuada ti nangato nga opisial ti panangsugod iti agpanpanday linteg tapno ipatungpal ti martial law.
Nagkaykaysa dagiti agpanpanday linteg a lappedan ti panangideklarar ni Yoon. Iti baet ti presensia dagiti suldado, limmusot isuda kadagiti abbeng ti parliamento tapno agbutos ken ibasura ti martial law rason tapno agsanud ni Yoon kalpasan laeng ti sumagmamano nga oras.
Basar kadagiti legal experts, mabalin a dumanon iti sumagmamano a bulan ti panangtingiting nangruna ket adda ti agarup 70 a ribu a panid ti ebidensia ken adu ti saksi.
Segun iti abugado a ni Min Kyoung-sic, posible a mairuar ti umuna a desision inton Agosto ngem mabalin a maiyalud-od pay daytoy gapu ta nadepende iti taray iti imbestigasion.
No mapaneknekan nga adda ti nalabsingna, ni Yoon ti agbalin a maikatlo a Presidente ti South Korea a mapatawan gapu iti insurrection kagiddan ti dua a dati a military leaders a karaman iti 1979 coup.
Daytoy a pannusa ket tungpal biag a pannakaibalud wenno panangpatay ngem manamnama a saan nga ipatungpal ti death penalty gapu iti maipatpatungpal a moratorium kadagiti panagpakamatay idiay South Korea sipod pay idi 1997.
