LAOAG CITY – Pimmusayen ti dati a Presidente ti Zambia a ni Edgar Lungu iti tawenna nga 68.
Kinumpirmaran daytoy ti partidona a Patriotic Front ngem saanen a nadakamat ti rason ti pannakatayna.
Nangiruar ti bidyu ti anakna a ni Tasila no sadinno a kunana a kadagiti naglabas a lawas ket naitaray iti ospital ti amana.
Naammoan a nagbalin a Presidente ni Lungu iti uneg ti innem a tawen manipud idi 2015 ken naabak daytoy iti eleksion idi 2021 kontra iti agdama a Presidente a ni Hakainde Hichilema.
Mainaig iti daytoy, kalpasan ti pannakaabakna ket nagsanod daytoyen iti pulitika agingga iti napalabas a tawen ngem nangiruar ti desision ti Korte Suprema a maipawil nga agpaidasig daytoyen gapu ta nalpasen ti dua a tawen a terminona.
Naipasngay idi Nobiembre 11, 1956 ken nagtupos isuna iti abogasia iti University of Zambia idi 1981.
Dimmalan pay daytoy iti military training iti Miltez army college idiay Kabwe.
