LAOAG CITY – Inawagan kas ‘political harassment’ ni dati a Presidential Spokesperson Harry Roque ti panangibalud kenkuana ti 24 nga oras iti House of Representatives.
Daytoy ket kalpasan ti panangimbestigar dagiti agpanpanday linteg ni Roque maipapan iti pakainaiganna iti Philippine Offshore Gaming Operators Hub idiay Pampanga.
Inbatadna a nalawag nga adda ti maris pulitika ti nasao nga inaramid dagiti opisial gapu ta saan laeng a nakaatendar daytoy iti panagdengngeg ket inbaludda isuna nga insigida.
Inlawlawagna nga awan ti planona a bastosen dagiti agpanpanday linteg gapu ta nakaatendar isuna ti namitlo a daras iti uppat nga imbitasionda kenkuana.
Maipalagip a naibalud ni Roque iti Kamara gapu iti maipagarup a panagulbudna iti naisayangkat a panagdengngeg.
Kabayatanna, binabalaw pay ni Roque ni Pres. Ferdinand Marcos Jr. no sadinno a dinakamatna nga immadu pay ti agrigrigat ita gapu kadagiti nangina a magatgatang pakairamanan ti kinakurang kadagiti pagrebbengan dagiti tattao.
