LAOAG CITY – Kinumpirmaran ni Ombudsman Jesus Crispin Remulla a karaman ni dati nga House Senior Deputy Speaker Aurelio “Dong” Gonzales Jr. kadagiti maim-imbestigaran iti maipagarop a pannakairaman na iti isyu iti flood control.
Maak-akusaran ni Gonzales a maysa daytoy a ‘congtractor’, ti mangdisdiskribir kadagiti kongresista nga addaan wenno mangimanmanehir tj construction companies a nakaala ti kontrata iti Department of Public Works and Highways.
Segun kenni Remulla, nalpasen ti panawen a ti Office of the Ombudsman ket arig na palubusan na latta ti kastoy.
Inpetteng na a maiparit ti kastoy nga aktibidad gapo ta maibikang a conflict of interest kadagiti sumagmamano a linteg mainaig iti kurapsyon isut gapo na a narigat a makalibas dagitoy.
Malaksid kenni Gonzales, kuna ni Remulla a manarimaan ti imbestigasyon kadagiti dadduma pay a siyam a pulitiko.
Inlawlawag na a saggaysaen ken tingitingen da a nasayaat gapo ta ado dagiti nalaing nga aglemmeng.
Mainaig iti daytoy, kuna ni Gonzales a welcome para kenkuana ti imbestigasyon ngem kunana a ti subject iti Ombudsman ket maibilang nga “appears rehashed.”
Innayon ni Gonzales a ti kaso kontra kenkuana mainaig iti kapada a proyekto ket inbasura ti Office of the Ombudsman idi 2023.
