LAOAG CITY – Inrakurak ni dati a Congressman Mike Defensor a nakasagana a mangsango ti reklamo a maipila kontra kenkuana ti National Bureau of Investigation (NBI) mainaig iti maipagarop a pannakairaman na iti human trafficking.
Iti ambush interview, inpetteng ni Defensor nga ip-ipiten ni National Bureau of Investigation Director Melvin Matibag ti pamilya da.
Inpaganetget na nga ibagbaga da ti human trafficking nga arigna maysa a prostitution den nga ilemlemmeng da idinto a nakawaywaya ti nadakamat a lugar.
Maipalagip a rinaot dagiti ahente ti National Bureau of Investigation ti Chicago KTV Bar iti Pasig City idi Abril ken naisalakan ti 54 a babbai iti naisayangkat nga operasyon.
Kukua ti kompanya a Cliffpoint ti pasdek nga ayan ti KTV Bar.
Segun ken ni Matibag, ni Defensor ti chairman ti Cliffpoint Development, ti kumpanya a mangipatpataray ti Cliffpoint Square no sadinno a masarakan ti KTV bar.
Innayon na nga iggem pay ni Defensor ti 65% ti Pax Libera Mining, a kukua met ti 72.96% ti Cliffpoint.
Kabayatanna, inpakaammo ni Matibag a ti asawa ni Defensor a ni Julie ti presidente ti Cliffpoint ken chairperson ti Bleu Hotel, idinto a ti anak da ti agserserbi kas corporate secretary ti kumpanya.
Inpalgak ni Defensor a kayat da laeng a pagulimiken iti ar-ramiden na a panangdillaw iti mapaspasamak a maipagarop a korapsyon iti gobyerno, aglalo iti flood control funds controversy.
