LAOAG CITY – Inlawlawag ni Mrs. Darlene Deuz, dati a revenue collector ti Laoag City Commercial Complex mainaig iti alegasyon a saan nga agis-isyu ti opisyal a resibo kadagiti tenant kalpasan a nagbayad dagiti maseknan ti renta da.
Segun kenni Deuz, saan a mabalin nga ipan da iti opisyal a resibo ti bayad dagiti tenant gapo ta installment ti panagbayad dagitoy kas kiddaw dagiti maseknan.
Inbatad na nga umabot ti 40 a ribo a pisos ti bayadan ti maysa a tenant depende iti kalawa ti stall da ken iremit da iti Terasury Office apaman a makakolektar.
Inlawlawag na a saan a makaumanay ti 10 a ribo a pisos nga it-ited dagiti tenant para iti business permit da gapo ta 19 a ribo a pisos ti masapol a bayadan da.
Kabayatanna, kuna na a no pakaseknan iti kaawan pay ti permit dagiti dadduma a tenant ket ni laeng Mr. Cedric Castro, dati a Licencing Officer iti merkado publiko ti makasungbat.
Inpetteng met ni Castro nga awan ti maig-iggaman na a kwarta ken no anya ti ibaga ni Deuz a nabayadan dagiti tenant ket isu ti iproseso na ngem saan na a maaramid daytoy no saan a makumpleto ti bayad.
