LAOAG CITY – Ad-ado manen dagiti innaganan ni dati a Public Works and Highways undersecretary Roberto Bernardo a karaman iti maipagarop a nakaawat ti kickbacks manipud iti infrastructure projects, pakairamanan ni dati a Secretary Manuel Bonoan.
Kabayatan ti panagtultuloy ti imbestigasyon ti Senate blue ribbon committee iti maipagarop nga anomalya iti flood control projects, inbasa ni Bernardo ti supplemental affidavit ken inadmitir na nga isu ti nang-facilotate iti maipagarop a kickback para kada Senators Jinggoy Estrada, Mark Villar, Education Secretary Sonny Angara, dati a senator Grace Poe, former Caloocan Rep. Mitch Cajayon-Uy, San Jose del Monte Mayor Rida Robes ken dati a DPWH undersecretary Maria Catalina Cabral.
Ummunan nga inraman ni Bernardo ni Senator Francis “Chiz” Escudero, dati a Senator Ramon “Bong” Revilla Jr. ken Nancy Binay, ken dati nga Ako Bicol Party-list Representative Zaldy Co a karaman iti anomalya iti ghost flood control projects.
Segun kenni Bernardo, insagana na ti listaan ti proyekto para kenni Revilla nga addaan ti 25% “commitments” wenno kickbacks nga agbalor ti P125 million.
Inlawlawag na a ti kwarta ket naideliver iti pagtaengan ni Revilla iti Bacoor, Cavite no sadinno innem a cardboard boxes ken maysa a paper bag a naglaon iti kada box ti P20 million ken P5 million iti kada paper bag.
Kunana a nakaawat ni Revilla ti kickbacks nga agbalor iti P250 million idi February.
Mainaig iti daytoy, inbatad pay ni Bernardo a nakaawat pay ni Binay babaen iti staff na iti 12% iti infrastructure projects idi 2022 ken 2023.
Dinakamat na pay a ni Bonoan ti nangiyalokar ti P500 million para kenni Binay iti babaen ti 2025 National Expenditure Program (NEP).
