LAOAG CITY – Mamati ni dati a Senador Leila De Lima a saan a ti Korte Suprema, no di ket ti Konstitusyon, ti rumbeng a mangilungalong iti Kongreso a mangipasa iti linteg kontra iti political dynasties.
Segun ken ni De Lima, ti Konstitusyon ti “supreme law of Congress” a mangimanmandar kadakuada nga ipasa ti maysa a linteg a mangipawil kadagiti political dynasty.
Reaksyon daytoy ni de Lima iti rakurak ni Senate President Francis Escudero a saan a kabaelan a piliten ti Korte Suprema ti Kongreso a mangipasa ti linteg kontra kadagiti political dynasties, ken daytoy ket maysa a “political question.”
Ti nasao a rakurak ket sungbat iti petisyon ti 1Sambayan Coalition ken sumagmamano a miyembro ti grupo, a mangkidkiddaw iti Korte Suprema a mangmandar iti Kongreso nga agaramid ti linteg kontra iti political dynasties.
Basar kadagiti petisyoner, saan a natungpal ti Kongreso ti responsibilidad da nga ipasa ti anti-dynasty law, agarop 40 a tawen sipud naipasa ti 1987 Constitution.
Dinakamat da pay a 80% dagiti nakatugaw iti kongreso ket iggem dagiti political families, isut gapuna nga ibilang da a maysa a panaglabsing iti Article II, Section 26 ti Konstitusyon.
